Қостанайда қылмыстық жазасын өтеп жатқандар туғандарын Отбасы күнімен құттықтады
Сотталған Н. домбырада бұрыннан ойнайды. Ол өзінің жақындарын осындай ерекше жолмен мерекемен құттықтағысы келген. Өйткені туыстарымен кездесу ылғи мүмкін бола бермейді. Ал домбырамен ол бір жағы жақындарын қуантады, екінші жағынан жадында қалған күйлерді тағы бір жаңғыртудың жақсы мүмкіндігі.
«Домбыраның үнін қатты ұнатам. Музыка маған қиындықтарды еңсеріп, өмірге деген көзқарасымның оң болуына ықпал етіп келеді. Мен бостандықта жүргенімде домбыра тартқанымды туғандарым ерекше ұнататын. Сондықтан бүгінгі сый оларға тағы бір қуанышты сәт сыйлады деген ойдамын»,-деді жазасын өтеуші.
Ведомствоның хабарлауынша, сотталғандарды туған-туыстарының қолдауы олардың түзелуіне, одан әрі қоғам өміріне белсене араласуына ықпал ететін мықты факторлардың бірі.
Қоныс колониясында осы күні Отбасы күніне арналған тағы да бірқатар шаралар өтті.
Мекеме басшылығы салтанатты жағдайда сотталғандарды құттықтап, оларға отбасылық құндылықтарды сақтаудың маңыздылығы туралы айтты. Сондай-ақ осы күні сотталғандар өздерінің жақындарын онлайн байланыс арқылы құттықтады.