Қостанай облысында обаға қарсы костюмдерді шетелге алып өтпек болғандар ұсталды
«2020 жылғы 24 қарашада Қостанай облысында «Қайрақ» автомобиль өткізу пунктінде Ресей Федерациясының «АВТО-ТЕК» жеке шаруа қожалығына тиесілі автокөлігі ұсталды, онда 600 дана обаға қарсы костюмдер болған. Жалпы сомасы 7750 000 теңге болатын медициналық киімдер пошта жүктерінің астында жасырылған», делінген ведомство таратқан хабарламада.
29 қараша күні Қостанай облысының «Аят» өткізу пунктінде «Алматы-Челябі» бағыты бойынша жүрген «ГАЗель» автокөлігі тексерілді. Тексеру барысында түрлі дәрі-дәрмектер толтырылған қораптар, 2640 дана қорғаныш маскалары және жалпы салмағы 1000 кг-ға жуық 1700 дана медициналық қолғаптар табылды. Медициналық құрал-жабдықтар жәшіктердің арасына жасырылған.
Тәркіленген заттардың құны шамамен 45 000 000 теңгені құрайды. Заңсыз шетел аспақ болған жүктер уәкілетті органдарға тапсырылды.
