21:25, 23 Қаңтар 2021 | GMT +6
Қостанай облысында дизельмен жүретін көліктердің қозғалысына тыйым салынды
ҚОСТАНАЙ.ҚазАқпарат - Қостанай облысында ауа райының бұзылуына байланысты жол жабылды, деп хабарлайды ҚазАқпарат.
«Солтүстік Қазақстан облысында аяз күшейіп, ауа температура минус 38 градусқа жетті. Соған байланысты 2021 жылғы 23 қаңтар сағат 18:00 бастап дизель отынын пайдаланатын көлік құралдарының республикалық маңызы бар жолда жүруіне тыйым салынады. Аяздың беті қайтқанша алыс жолға шықпағандарыңыз жөн», - деп ескертеді облыстық ТЖД баспасөз қызметі.
Қазіргі уақытта республикалық маңыз бар жолдарда қозғалыс шектелді. Атап айтқанда, «М-36 «РФ (Екатеринбург қаласы) шекарасы – Алматы» тасжолының 386-729 шақырымы, Сарыкөл ауданы мен СҚО шекарасы, «А-21 «Мамлютка-Қостанай» бағытының 180-250 шақырымы, СҚО мен Қостанай облысының Ұзынкөл ауданы шекарасында жол қозғалысына уақытша тыйым салынды.
Аталмыш жолдар күн райы жақсарған соң ғана ашылады.