Көлік ұрлап, жол апатын жасаған күдікті ұсталды
Түркістан облыстық ПД баспасөз қызметінің мәліметінше, көлік иесі Жетісай АПБ-не арызданған.
Оның айтуынша, таңғы сағат 07:00-дер шамасында Шымкенттен Жетісайға келе жатқан жолда Сарыағаш жақтан ерлі-зайыпты азаматтар қол көтерген. Оларды көлік иесі отырғызып, алып кеткен. Алайда көліктің артқы жағында отырған ер адам Жетісайға келгенде өзін қылқындырып, көлікті тоқтатуға мәжбүр болған. Осы сәтті пайдаланған күдікті көлігін ұрлап кеткен.
Оны ұстау мақсатында жетісайлық полицейлерден арнайы топ құрылып, оқиға орнына жетеді. Нәтижесінде қала көшелерінің бірінен көліктің жол-апатына түсіп, аударылып жатқан жерінен табады. Жәбірленуші көлікте қалдырған ұялы телефонын таба алмаған. Полицейлер жақын арадағы базарларға барып, ұялы телефон сатып алушылардың дүкендерін тексерді. Жедел-іздестіру жұмыстарының нәтижесінде, 2-3 сағат ішінде күдіктіні ұялы телефонды сатып тұрған жерінен қолға түсірді. «Тергеу барысында оның Шымкент қаласының тұрғыны екені анықталған. Жетісай қаласындағы ата-анасының үйіне әйелімен келе жатқанда арам ойын іске асырған.
Қазіргі таңда ҚР ҚК 200-бабы және 188-бабы (Ұрлық) бойынша қылмыстық іс қозғалды. Ол қамауға алынды. Тұлғасын анықтау барысында бұған дейін «Тонау» қылмысымен сотты болғаны белгілі болды. Қазіргі таңда сотқа дейінгі тергеу амалдары жүргізілуде», делінген хабарламада.
Өз кезегінде бұзақыға тап болып, көлігінен ойда-жоқта айырылған тұрғын жетісайлық полицейлерге алғыс айтты.