Көкшетауда жалғыз басты қарияларға түскі ас үйлеріне жеткізілуде

Әкімдіктің мәліметінше, Елбасының бастамасымен қолға алынған «Biz birgemiz» акциясын жүзеге асыруға Nur Otan партиясымен бірге, Nomad MMA республикалық федерациясы да атсалысуда.

«Сәуірдің 3-нен бастап Көкшетау қаласында жалғыс тұратын қарияларға (80 жастан асқан) ыстық түскі ас үйлеріне жеткізілуде. Тағамды арнайы дайындықтан өткен адамдар жеткізіп береді. Олардың әрқайсысымен жеке келісім жасалған. Онда персоналдық жауапкершілік пен сантиралық нормаларды қамтамасыз ету нұсқаулығы толық көрсетілген», - дейді ведомстводан.

«Біз карантин кезінде әлеуметтік жағынан осал топтарға жататын егде жастағы адамдармен жұмыс істеудеміз. Біз тұрғанда олар жалғыз болмайды. Біз оларға қамқорлық көрсетеміз», - деп атап өтті Nomad MMA федерациясының президенті Гаджи Гаджиев.

Қариялардың үйлеріне бармас бұрын әр курьердің денсаулығы тексеріліп, дезинфекциялаудан өтеді. Оларға санитарлық нормалар мен ережелерге сай эпидемияға қарсы киім, көзілдірік, қолғап беріледі. Бұл үшін бөлек қаржы қарастырылған.

«Курьерлер денсаулығына байланысты біреудің көмегіне мұқтаж, тағдырдың тәлкегіне түскен қарттардың үйлеріне барады. Біз көкшетаулықтарды қайырымды іске атсалысып, #bizbirgemiz акциясын қолдауға шақырамыз», - деп толықтырды Көкшетау қаласы әкімдігінің баспасөз қызметіндегілер.