Қазақстанның Қарулы Күштері Әскери барлаушы күнін атап өтуде

None
None
НҰР-СҰЛТАН. ҚазАқпарат - 5 қараша – барлау бөлімшелері әскери қызметшілерінің кәсіби мерекесі. 1992 жылы дәл осы күні Қазақстан Қарулы Күштері Бас штабының Барлау басқармасы құрылды.

Әскери барлау мемлекеттің қауіпсіздігін қамтамасыз етуде маңызды рөл атқарып, елдің қорғаныс қабілетін нығайтуға айтарлықтай үлес қосады, деп хабарлайды ҚазАқпарат ҚР Қорғаныс министрлігінің баспасөз қызметіне сілтеме жасап.

Бүгінгі күні арнайы операциялар күштері, барлау бөлімдері мен арнайы мақсаттағы бөлімшелер қарқынды дамуда.

Жедел, жауынгерлік даярлық іс-шаралары барысында барлаушылар дағдыларын және шеберліктерін жетілдіріп, шыңдайды.

2021 жылы барлау бөлімшелерінің әскери қызметшілері «Қалқан», «Іздеу», «Отпантау» оқу-жаттығуларына қатысты. Соңғы маневрлер барысында әуе және жерүсті барлауының бүкіл іс-қимылдарын әскер топтары іске асырды. Нәтижесінде шартты қарсыластың күштері мен құралдарына жоғары дәл соққылар жасалды. Оқу-жаттығулар мен кешенді тексерулердің нәтижелері Қазақстанның Қарулы Күштерінде мамандарды даярлаудың шетелдіктерден кем түспейтін дербес, отандық жүйесі барлығын дәлелдейді.

Аса күрделі, өмірге қауіпті тапсырмаларды орындауда барлау бөлімшелерінің әскери қызметшілері айрықша төзімділік, батылдық пен кәсіби шеберлік көрсетеді.

Отанға шын берілу, борышыңды сезіну, жанқиярлық таныту – мемлекет мүдделерін қорғау жолындағы әскери барлаушылардың басты қасиеттері.


Соңғы жаңалықтар