Қазақстандық параспортшылар Азия ойындарына аттанды
Джаркартадағы ІІІ Азия паралимпиада ойындары 6-18 қазан аралығында өтеді. Оған елімізден спорттың 9 түрінен 91 параспортшы қатысады. Атап айтқанда үстел теннисі, парадзюдо, паражүзу, оқпен ату, парапауэрлифтинг, садақпен ату, шахмат, пара жеңіл атлетика, отырып ойнау волейболы.
«Елімізде ерекше күтімді қажет ететін жандардың спортпен айналысуы үшін жағдай жасалуда. Соның бір дәлелі - жуырда Елбасының қатысуымен Астанада ашылған паралимпиадашыларға арналған жаттығу залы. Ол өз кезегінде спортшыларға жағдай жасап қана қоймай, олардың осындай спорттық бәсекелерде жеңіске жетуге ынталандырады. Ең бастысы, бір тудың астында бір команда болып еліміздің абыройын қолдан бермей, намысын қорғау», - деді ҚР Мәдениет және спорт министрлігі Ұлттық командалар мен спорт резервтері дирекциясының директоры Самат Ерғалиев. 
Оның айтуынша, параспортшылардың нәтижелі жетістікке жететініне сенім мол. Атап айтқанда, Зульфия Габидуллина, Раушан Қойшыбаева, Әнуар Ахметов секілді спортшыларға үлкен үміт артылып отыр. Бұның тағы бір себебі - аталған Азия ойындары спортшылардың халықаралық біліктілігін жетілдірумен бірге, 2020 жылы Токиода өтетін Паралимпиадаға жолдама береді. 
Салтанатты шара соңында мемлекеттік ту паражүзу бойынша Азия ойындарының бірнеше дүркін чемпионы Әнуар Ахметке табыс етілді. Спортшы Азия ойындарының салтанатты ашылу сәтінде де еліміздің туын алып жүреді. 
Айта кетейік, бұған дейін өткен Азия ойындарында елімізден параспорттың 9 түрінен 82 спортшы қатысып, оның ішінде 7 адам алтын медаль иеленген. Биылғы Азия ойындарында жеңімпаз атанғандарға берілетін сыйақы сомасы белгіленген. 1 орын иеленген спортшыға - 10 мың доллар, 2 орын - 5 мың доллар және 3 орынға - 3 мың доллар табыс етіледі.