09:45, 24 Ақпан 2020 | GMT +6
Қазақстандық боксшы Жан Кособуцкийдің келесі жекпе-жегі қашан өтеді
НҰР-СҰЛТАН. ҚазАқпарат – 31 жастағы аса ауыр салмақтағы Жан Кособуцкий (12-0, 11КО) 6 наурызда рингке оралып, Дубайдағы (БАӘ) бокс кеші аясында өнер көрсетеді. Оның қарсыласы кім екені әзірге жарияланбады, деп хабарлайды ҚазАқпарат.
Айта кетейік, Кособуцкий таяуда промоутерін ауыстырып, Universum Box-Promotion компаниясымен келісім жасаған еді. Бұл компанияның бұрынғы клиенті Геннадий Головкин (40-1-1, 35КО) болған.
Жан Кособуцкий соңғы айқасын 9 қарашада өткізді. Ол Гамбургте (Германия) өткен айқастың бірінші раундында хорватиялық жеңіліп көрмеген боксшы Агрон Смакичиді (15-1, 13КО) нокаутқа түсіріп, аса ауыр салмақтағы бос тұрған IBO Inter-Continental чемпион белбеуін иеленген болатын.