Қазақстандағы ақылы жолдарда жүргізушілерге тегін көмек көрсетіледі

None
None
НҰР-СҰЛТАН. ҚазАқпарат - Ақылы автожолдарда жанармайы таусылған немесе автокөлігі бұзылған жүргізушілерге көмек тегін көрсетіледі, деп хабарлады «ҚазАвтоЖол» ҰК өкілдері Павлодар облысындағы қоғамдық тыңдауда.

Павлодар облысының Павлодар, Екібастұз, Ақсу, Аққулы, Железин және Тереңкөл аудандарында Нұр-Сұлтан – Павлодар, Павлодар – РФ (Омбы) шекарасы, Павлодар – Семей – Қалбатау учаскелерінде ақы алудың ашық жүйесін енгізу мәселесі бойынша қоғамдық тыңдау өтті, деп хабарлайды ҚазАқпарат «ҚазАвтоЖол» ҰК баспасөз қызметіне сілтеме жасап.

Алдағы уақытта тыңдау Шығыс Қазақстан облысында жалғасады. «ҚазАвтоЖол» Ұлттық компаниясының өкілдері Семей, Шар, Бесқарағай және Жарма аудандарының тұрғындарымен кездеседі.

Олар өңір тұрғындарына ақы алудың ашық жүйесінің жұмыс принциптерін, төлем тәсілдерін, жеңілдіктер, жол бойындағы сервисті дамыту және ақылы учаскелерде қауіпсіздікті қамтамасыз ету жүйелерін түсіндіреді.

Олардың ақпараты бойынша, Павлодар облысының үш ақылы учаскесінде пилоттық режимде 10 бақылау аркасы жұмыс істейді. Сондай-ақ клиенттермен жұмыс істейтін 4 орталықты іске қосу жоспарлануда. Павлодар – Омбы және Павлодар – Семей – Қалбатау жолдарында жеңіл көліктен төлем алынбайды.

Сондай-ақ, реконструкциялау жұмыстары аяқталғанға дейін Нұр-Сұлтан – Павлодар тас жолындағы жөнделіп жатқан ұзындығы 24 км жол учаскесімен жүру тегін болады.

Таныстырылымнан кейін сұрақ-жауап сессиясы өтті. Онда «ҚазАвтоЖол» мамандары ақылы учаскелерде жол апаты, техникалық ақау немесе жанармайдың таусылуы сияқты қиын жағдайға тап болған жүргізушілерге қолдау көрсететін қызметтер жұмыс істейтінін хабарлады. Көмек көрсету тегін болады. Қолдау қызметін шақыру үшін 1403 қысқа нөмірі арқылы «ҚазАвтоЖол» байланыс орталығына хабарласса жеткілікті.

«Тыңдаулардың қорытындысы бойынша Павлодар облысының жұртшылығы өңірдің жолдарын ақылы ету жөніндегі мемлекеттің жоспарларына оң баға берді. Сонымен қатар, жергілікті тұрғындар ашық ақылы жүйе енгізілгенге дейін барлық жолдар тиісті жағдайға келтірілсе деген тілек білдірді. Сондай-ақ, автожолдар жиегінің енін кеңейту, жаңа жолдар құрылысының сапасын жақсарту ұсынылды»,-делінген хабарламада.


Соңғы жаңалықтар