Қазақстан Иранға қандай тауарларды жеңілдікпен кіргізе алады

None
None
НҰР-СҰЛТАН. ҚазАқпарат - Парламент Сенатының жалпы отырысында «Бір тараптан Еуразиялық экономикалық одақ пен оған мүше мемлекеттер және екінші тараптан Иран Ислам Республикасы арасындағы еркін сауда аймағын құруға алып келетін уақытша келісімді ратификациялау туралы» Заңды қабылдады, деп хабарлайды ҚазАқпарат тілшісі.

Бұл келісімге 2018 жылғы мамырда Қазақстан елордасында қол қойылды. Осы орайда Иранмен еркін сауда аймағын құру бастамасын Мемлекет басшысы 2014 жылы Каспий маңы мемлекеттері басшыларының саммитінде ұсынды.

«Бұл келісімді іске асыру отандық тауарларды 80 миллионнан астам халқы бар Иранның перспективті нарығына шығару арқылы олардың экспортын ұлғайтуға мүмкіндік береді. Жалпы алғанда, осындай келісім экспортты әлемдік нарыққа шығару тетіктерінің бірі болып отыр», - деді Ұлттық экономика министрі Руслан Дәленов.

Белгілі болғандай, Иранмен өзара сауда көлемі 2018 жылы 516 млн АҚШ долларына жетті, оның ішінде 82,6 пайызы Иранға бағытталған экспортқа тиесілі. Экспортқа шығарылған негізгі тауарлар арасында арпа, болат, рапс тұқымы, қой еті бар.

Келісімге сәйкес, Иран тарапы 864 тауарға қатысты импорттық баж ставкаларын төмендетеді. Иран нарығына ірі қара мал және қой еті, бұршақ дақылдары, өсімдік майы, кондитерлік өнімдер, рельстер, аккумуляторлар, арматура мен құбырлар және басқа да тауарларды жеңілдетілген тариф бойынша әкелу мүмкін болады.

«Бұл тауарлар бүгінде Қазақстанның Иранға экспортының жартысынан астамын алып отыр. Өз кезегінде Еуразиялық экономикалық одақ елдері 502 тауар бойынша импорттық баж ставкаларын төмендетеді. Олардың ішінде құрма, жүзім, кондитерлік өнімдер, ыдыс, кілемдер және өзге тауарлар қамтылған», - деді министр.

Келісім ратификациялау рәсімдерін тараптар аяқтағаннан бастап 60 күннен кейін күшіне енеді. Оның қолданылу мерзімі үш жыл.

«Ратификациялаудан кейін 1 жыл ішінде тараптар еркін сауда аймағы туралы тұрақты келісім бойынша келіссөздерді бастайды. Уақытша келісім ережелері Дүниежүзілік сауда ұйымы нормаларына толық сәйкес келеді», - деді Руслан Дәленов.

Соңғы жаңалықтар