Қарқаралыда Алаш арыстарының ескерткіші бой көтерді

Еңселі ескерткіш жергілікті суретші Сәкен Дәулетбаев, мүсіншілер Талғат Байоразов пен Кенжебек Қошантаевтың авторлығымен тұрғызылды. Мүсіннің биіктігі 3,15 метр, салмағы 2 тонна.

Тәуелсіздік жолында саяси оқиғалардың бесігі болған қасиетті Қарқаралыдағы қуанышты әлеуметтік желі қолданушылары сүйіншілеп бөлісіп жатыр.

«Бүгін Қарқаралы қаласында «Алаш арыстары» ескерткіші ашылған екен. Әлихан Бөкейхан, Ахмет Байтұрсынұлы, Әлімхан Ермекұлы аталарымыздың құрметіне. Құтты болсын! Шіркін-ай, Жетісудың қақ ортасында Барлыбек Сырттанұлы, Мұхамеджан Тынышбайұлы, Садық Аманжолұлы, Ыбырайым Жайнақұлы, Біләл Сүлейұлы, Базарбай Мәметұлы сынды жетісулық Алаш арыстарына осындай еңселі ескерткіш қойылса, жақсы болар еді», - деп жазады Алаш тақырыбын зерттеп жүрген Елдос Тоқтарбай.

«Ескерткіш деген осындай болуы керек. Ескерткіш деген осындай тұлғаларға қойылуы керек», - деп жазады Азамат Қасым есімді тілші.

Айта кетсек, осыдан екі жыл бұрын елордада Алаш партиясының құрылғанына 100 жыл толуына орай ауқымды халықаралық конференция өткен болатын. Алаш тақырыбын зерттеген Мәмбет Қойгелді, Зиябек Қабылдинов пен Әбдіуақап Қара қатарлы ғалым-профессорлардың сол тұста айтқан пікірін мына сілтемеден оқуға болады.