Карантин: Көкшетауда 4 мониторингтік топ жұмыс істейді

Бүгінгі кезде Көкшетауда 4 мониторингтік топ жұмыс істеуде.

«Бүгін біз «Орталық базардың» жұмыс істеп тұрғанын анықтадық. Облыстың бас санитарлық дәргерінің №129 қаулысы бойынша демалыс күндері базарлардың жұмысына тиым салынған болатын. Сонымен бірге, көпшілік іс-шара өткізген мейрамхана да анықталды», - деп атап өтті Көкшетау қаласының бас санитарлық дәргері Қанат Ысқақов.

Көкшетау қалалық тауарлар және көрсетілетін қызметтердің сапасы мен қауіпсіздігін бақылау басқармасы басшысының сөзінше, бүгінгі күні Көкшетау қаласында коронавирус инфекциясын жұқтырғандардың саны артқан. Станционарларда 70 адам емделуде. Осы ретте, ол көкшетаулықтарды тәртіпке бағынуға және санитарлық шараларды қатаң сақтауға шақырды.

Көкшетау қалалық тауарлар және көрсетілетін қызметтердің сапасы мен қауіпсіздігін бақылау басқармасы басшысының орынбасары Әсел Сәрсенбаева кезекті мониторинг кезінде карантиндік шектеу талаптарын бұзу оқиғасы анықталғанын айтуда.

«Мониторинг кезінде мейрамхана ішінде орналасқан «Family Mood» балалардың ойын алаңы жұмыс істегені анықталды. Қала тұрғындары карантиндік шектеулерге құлақ асатын емес, көпшілік шаралар мен отбасылық салтанат өткізуде. Сол себепті, қала тұрғындарын карантиндік шараларды ескеріп, көпшілік орындарға бармауға, маска режимін сақтауға шақырамыз», - деп толықтырды Ә. Сәрсенбаева.