Қарағандыдағы атыс: Полиция жағдайды түсіндірді
27 қазанда сағат 22.00 шамасында Қарағанды қаласы Октябрь полиция бөліміне шағын аудандардың бірінде такси жүргізушісіне шабуыл жасалғаны туралы хабарлама келіп түсті.
Оқиға орнына бірінші болып Қарағанды қаласы патруль полиция полкінің жасағы жетті.
Жәбірленуші, таксомотор паркінің 35 жастағы жүргізушісі полицияға жол ақысын төлеуден бас тартқан жолаушымен жанжал болғанын түсіндірді.
Қақтығыс кезінде клиент пышақ алып, жәбірленушіге шабуыл жасаған. Бірақ жүргізуші көліктің салонынан қашып үлгерген.
О сы кезде көшеде өтіп бара жатқан бір азамат такси жүргізушісіне көмекке келген. Ер адамдар көліктен қаскүнемді алып шығуға тырысқан.
Алайда ол қарсыластарына пышақ ала жүгірген.
Сол мезетте жүргізушіге көмекке келген азамат оған белгісіз травматикалық қарудан бірнеше рет оқ атқан.
«Полиция қызметкерлері ізін суытпай мас болған 55 жастағы ер адамды ұстады. Оған медициналық көмек көрсетілді, ауруханаға жатқызылған жоқ. Аталған факті бойынша ҚР ҚК 293-бабы «бұзақылық» бойынша сотқа дейінгі тергеу басталды. Қазіргі уақытта оқ атқан адамның аты-жөні анықталып жатыр», - деп хабарлады Қарағанды облысы ПД баспасөз қызметі.