18:05, 03 Қараша 2019 | GMT +6
«Канело» Ковалевты жеңгеннен соң Головкинмен жекпе-жек туралы айтты
НҰР-СҰЛТАН. ҚазАқпарат – Мексикалық боксшы Сауль Альварес (53-1-2, 36 КО) ресейлік Сергей Ковалевты (34-4-1, 29 КО) жеңген соң Геннадий Головкинмен өтуі мүмкін жекпе-жек туралы айтты, деп хабарлайды ҚазАқпарат Sports.kz-ке сілтеме жасап.
«Келіп, маған қолдау білдіргендердің барлығына алғыс айтамын. Жеңіске жетіп, тарихқа атымды жаза алғаныма қуаныштымын. Бәріңізді сабырлы болуға шақырамын, өйткені «Канело» деген ол — кепілдік! Головкинмен жекпе-жек? Мен бұрын да оның маған аса қызық емес екенін айтқанмын, бірақ бизнес жағынан қызық жері бар. Көреміз», - деді Альварес.
«Канело» Ковалевты он бірінші раундта нокаутқа жіберіп, WBO тұжырымы бойынша жартылай ауыр салмақтағы әлем чемпионы белдігін тартып алды. Мұнымен мексикалық боксшы төртінші салмақ санатында әлем чемпионы болып отыр.