17:36, 16 Қазан 2020 | GMT +6
Қандасымыз Уәлихан Серікұлы Қытай чемпионатында алтыннан алқа тақты
ҮНЖУ. ҚазАқпарат - Шыңжаңдық қандасымыз Уәлихан Серікұлы грек-рим күресінен Қытай чемпионатының алтын медалін ұтып алды, деп хабарлайды ҚазАқпарат тілшісі.
Бұл жарыс бүгін Қытайдың Үнжу қаласында басталған болатын. Уәлихан Серікұлы 63 келі салмақта өнер көрсетіп, финалда шанхайлық қарсыласын 9:0 есебімен ұтты. Қандасымыз осыдан кейін Олимпиадаға лицензиялық іріктеу турниріне қатысатын болады.
У.Серікұлы – 1993 жылы Шыңжаңның Дөрбілжін ауданында дүниеге келген. Қытай құрамасының сапында өнер көрсетеді. Қытай чемпионатының 4 дүркін жүлдегері, Мажарстан астанасы Будапеште өткен әлем чемпионатының қола жүлдегері, Азия чемпионатында 3-орын иеленген.
Уәлиханның бапкері Әлнұр Төргеұлы – халықаралық дәрежедегі спорт шебері, Азия чемпионатының күміс жүлдегері. Қытай атынан 2004 жылғы Афины Олимпиадасына қатысқан.
