Инвестор Маңғыстаудағы Доңға кен орнын игеру келісімін 2039 жылға дейін ұзартты
Ведомство басшысы Мағзұм Мырзағалиев Үкімет отырысында осылай деп мәлімдеді.
«Маңғыстау облысының әлеуметтік-экономикалық дамуының 2021 – 2025 жылдарға арналған кешенді жоспары бойынша министрлік бірқатар іс-шараларды іске асырады. Біріншіден, министрлік «Total» компаниясымен Доңға кен орны бойынша өнімді бөлу туралы шарттың мерзімін 2024 жылдан 2039 жылға дейін ұзартты. Есесіне «Total» компаниясы 2021-2025 жылдары шамамен 70 млрд теңге инвестиция құяды. Нәтижесінде компания мұнай өндіру деңгейін 25% арттыруды қамтамасыз етеді», - деді министр.
Оның айтуына қарағанда, келісімнің ұзартылуы мұнай өндірісінің көлемін қазіргі жылына 680 мың тоннадан 860 мың тоннаға дейін арттырып, құрылыс кезінде 400-ге жуық жұмыс орнын құрады.
«Екіншіден, «ҚазМұнайГаз» компаниясы Өзен, Жетібай және Қаламқас кен орындарына іргелес учаскелерде қосымша геологиялық барлау жұмысын жүргізеді. Осылайша, Бектұрлы, Шығыс және Өзен-Қарамандыбас учаскелерінде 26 млрд теңге сомасына геологиялық барлау жұмысын жүргізу жоспарланған», - деді Мағзұм Мырзағалиев.