Инвестиция бойынша 2 өңір төмен көрсеткіш көрсетіп отыр - министр

«Көптеген өңірлерде жоғары инвестициялық белсенділік сақталуда. Кен өндіру өнеркәсібін есепке алмағанда, инвестициялардың орташа өсуі 34 пайызды құрады. Инвестициялардың айтарлықтай өсуін өңдеу өнеркәсібі – 2,4 есе, ақпарат және байланыс – 63%, ауыл шаруашылығы – 55%, көлік – 42%, құрылыс – 39%, сауда – 29% және жылжымайтын мүлікпен операциялар 16% көрсетті», - деді министр Үкімет отырысында биылғы қаңтар-наурыздағы қорытындыларды баяндай келе.

Оның айтуынша, күн электрстанциялары мен «Керуен-сарай» көпфункционалды туристік кешенін салу есебінен Түркістан облысында, сондай-ақ өнеркәсіп нысандарын салу мен өндіріс құрылғыларын алудың өсуі есебінен Шымкент қаласында, ал тұрғын үй және әлеуметтік нысандар мен инженерлік инфрақұрылым салу есебінен Алматы қаласында ең жоғарғы көрсеткіштер байқалды.

«Инвестициялар бойынша 2 өңір төмендеуді көрсетіп отыр. Қарашығанақ кен орнын кеңейту жобасы бойынша құрылыс-монтаждау жұмыстарының азаюынан Батыс Қазақстан облысында, Теңіз кен орнын келешекте кеңейту жобасы мен ұңғыма ернеуінің қысымын басқару жобасы бойынша құрылыс-монтаждау жұмыстарының азаюы салдарынан Атырау облысында инвестиция төмендеген», - деді Ә. Ерғалиев.

Бұдан бұрын хабарланғандай, жылдық инфляция 7 пайызға дейін баяулады.