Індетті жеңуге болады - Премьер-Министрдің орынбасары

«Мемлекет басшысының нақты тапсырмасы берілді. Коронавирусқа байланысты күрделенген мәселелерді шешу бойынша жолдар айқындалды. Сондықтан індетке қатысты баршамыз бірдей жауапкершілікпен қарағанымыз жөн. Басында коронавирусқа сенбеген кездер болды. Осы күмәннің бәрі артта қалды деп айтуға толықтай негіз бар деп ойлаймын. Қазіргі қабылданған шешімнің жүзеге асуы әр азаматқа тікелей баланысты», - деді Е.Тоғжанов Орталық коммуникациялар қызметінде.

Осы орайда ол халықтан карантин шараларына түсіністікпен қарауды сұрады.

«Осы бағытта дұрыс түсініп, атқарылатын шараларда бір-бірімізді толықтай қолдайтын болсақ, індетті жеңуге болады», - деді Үкімет басшының орынбасары.

Е. Тоғжановтың атап өтуінше, коронавирус инфекциясына қарсы күрес аясында енгізілген шектеулерге қарамастан, елімізде тығылып той тойлау үрдісі тыйылмай жатыр.

Еске сала кетейік, бүгін Мемлекеттік комиссия эпидемиологиялық жағдайды тұрақтандыру жөніндегі шараларды бекіткен болатын. Қазақстанда эпидемиологиялық ахуалдың өршуін және коронавирус инфекциясымен сырқаттанушылықтың өсуін ескере отырып, Мемлекеттік комиссия биылғы 5 шілдеден бастап 14 күнге келесі шектеу шараларын енгізу туралы шешім қабылдады.

Карантин талаптарын бұзған қазақстандықтар айыппұл төлейтін болды.