«Хабар» агенттігі өз өнімдерін халықаралық Канн көрмесінде ұсынуда

Көрме жыл сайын Каннда дүние жүзінің эфирлік, кабельдік, цифрлық және жерсеріктік телевизия және радиохабар тарату саласындағы фильмдер мен бағдарламалар өндірушілерінің басын қосады.

«Біздің мақсатымыз – отандық көрермендерге қызықты болатын өнімді табу. Сонымен қатар агенттік өндірген туындыларды әлемге таныту, паш ету. Қуантатыны, халықаралық нарықта біздің өнімге сұраныс жоғары. Танып, біліп жатқандар қаншама. Одан бөлек, бірнеше телекомпаниялар біздің агенттіктен өз контенттерін таратуға көмек көрсетуімізді сұрап келді», - деді «Хабар» агенттігінің басқарма төрағасы Ерлан Бекхожин.

«Хабар» Агенттігі биыл өткен жылдардың маусымдық хиттерін ғана емес, сонымен қатар Сидней олимпиадасының чемпионының тағдыры туралы «Бекзат» биографиялық драмасын, ұшқыштар туралы «Дала қырандары» туындысын, «Дулати» тарихи драмасын, «Рауза» мелодрамасы сынды тағы да басқа жаңа өнімдерін ұсынуда.