Гандболдан әлем чемпионаты: Қазақстан қыздары Румынияға есе жіберді
Қазақстан қыздары С тобында сынға түседі. Қарсыластары – Норвегия, Румыния және Иран құрамалары.
Румыния әлемде үздік көрсеткішімен бағаланады. Әлем чемпионатында 1962 жылы алтын алса, одан кейін екі мәрте күміс, бір рет қола жүлдегер атанды. Сондай-ақ, 2010 жылы Еуропа чемпионатында қола жүлдеге қол созды.
Бүгінгі кездесуде румыниялық гандболшылар ширақ қимылдай білді. Нәтижесінде бірінші кезең олардың басымдығымен 14:9 есебімен аяқталды.
Екінші кезеңде румындар басымдығын арттыра түсті. Олардың тарапынан көбірек шабуыл ұйымдастырылды.
Кездесуде Қазақстан қыздары қарсыласынан 17:38 есебімен жеңіліп қалды.
Енді Қазақстан қыздары 7 желтоқсанда Иран құрамасымен кездессе, Румыния Норвегиямен шеберлік байқасады.
Еске салсақ, бұдан бұрын ұлттық құрама Норвегияға жол берді.
Әлем чемпионаты 1-19 желтоқсан аралығында Испанияның Лирия, Кастельон, Гранольерс, Торревьеха қалаларында өткізіледі. Дүбірлі додада барлығы 32 құрама бақ сынайды.