Футболдан ел біріншілігінде «Астана» «Ордабасыны» жеңді
Кездесу барысында екі команда тартысты ойын өткізді. Гол соғатын көптеген мүмкіндік болды. Алайда, оны тиімді пайдалана алған жоқ.
Ойынның 16-минутында елордалық команда сапынан Педро Эуженио мергендік танытты. Оған 44-минутта Серж Ньюадзи бір голмен жауап қайырды.
Екінші кезеңде командалар көбірек шабуылға шықты. Дегенмен, олардың тепкен доптары діттеген нысанасына жетпей жатты. Кездесудің 95-минутында елордалық Станислав Басманов жеңіс голын соқты.
Осылайша, «Астана» қарсыласынан 2:1 есебімен басым түсті.
Бұл жеңісінен кейін елордалық клуб 17 ұпай жинап, турнир кестесінде екінші орынға көтерілді.
Сондай-ақ, бүгін Петропавлдың «Қызылжары» мен «Тараз» командалары 1:1 есебіне қанағат білдірді.
Аталған турда бүгін 20:00-де «Қайрат» (Алматы) пен «Атырау», «Тобыл» (Қостанай) мен «Ақсу» (Павлодар облысы) командалары кездеседі.
Ертең, 8 мамырда «Ақжайық» (Орал) пен «Мақтарал» (Түркістан облысы), «Каспий» (Ақтау) мен «Ақтөбе», «Тұран» (Түркістан) мен «Шахтер» (Қарағанды) командалары шеберлік байқасады.
Бұған дейін футболдан Қазақстан біріншілігі басталатыны жазылған.