Ертең автоқызмет көрсететін ХҚО-лар жұмысын қайта бастайды
«Азаматтарға арналған үкімет» мемлекеттік корпорациясының басқарма төрағасы Әділ Қожықовтың мәлім еткеніндей, мемлекеттік қызмет көрсететін мамандандырылған ХҚО-лар дүйсенбі-жұма күндері аралығында сағат 09.00-ден 18.00-ге дейін жұмыс істейді.
Оның сөзіне қарағанда, әзірге үш өңірде – Алматы қаласы, Алматы және Жамбыл облыстарында ғана автоХҚО-лар ашылмайды. Олардың қызметінің жандануы бойынша ақпарат қосымша хабарланады.
«Автоқызметтер – сұранысқа ие мемлекеттік қызметтердің бірі. Мамандандырылған ХҚО-лар қайта ашылған кезде оған клиенттердің көптеп келетінін болжап отырмыз. Кезек бола қалса, сабыр сақтап, бұл жағдайға түсіністікпен қараған жөн. Сондай-ақ автокөлікті Kaspi және Halyk Homebank банк қосымшалары арқылы қайта ресімдеуге болатынын еске саламын. АвтоХҚО-ларда кезек тудырмас үшін осы сервистерді пайдалануға кеңес беремін», - деді Ә.Қожықов.
Мамандандырылған ХҚО ғимаратына адамдар «Ashyq» қосымшасымен кіре алады. Эпидемиологиялық жағдайға байланысты клиенттер бетперде тағып, санитарлық талаптарды сақтауы тиіс.
Еске сала кетейік, бұдан бұрын Батыс Қазақстанда ХҚО-лар жұмысы жанданғанын жазған болатынбыз.