Елордада еріктілер көшеде ыстық шай мен бауырсақ таратты
«Бүгін ауа-райының қолайсыздығына қарамастан, еріктілер «30 игі іс» акциясын қолдауға шығып, елорда тұрғындары мен қонақтарына, қаламызды тазалайтын «Астана тазалық» ЖШС қызметкерлеріне ыстық шай мен бауырсақ таратты. Осылайша, еріктілер осы аязды күні жақсы көңіл-күй сыйлап, өз ықыластарымен көпшілікті жылытты. Барлығы 50 литр шай және 7 келі бауырсақ таратылды«, - деп хабарлады «Астана жастары« жастар ресурстық орталығы.
Қардың көп түскені жеке үй тұрғындарына, қарт адамдарға көп қиындық тудырды. Осыған байланысты қалалық штаб пен Қазақстан Еріктілер лигасының еріктілері акция аясында зейнеткерлерге аулалардағы қарды тазартуға көмектесті.
«Еріктілер жалғыз тұратын қарт адамдарға, соғыс ардагерлері мен тыл еңбеккерлеріне көмектесті. :астар 30 қарттың ауласын қардан тазартты. Акцияға қатыса отырып, еріктілер жас ұрпақтың ардагерлер мен тыл еңбеккерлерінің қосқан үлестерін есте сақтайтынын және бағалайтынын көрсеткісі келеді», - деп атап өтті ЖРО.
Еске сала кетейік, Қазақстан Тәуелсіздігінің 30 жылдығы қарсаңында елордада «30 игі іс» ұранымен эстафета басталды.
Қала тұрғындары эстафетаға қосылып, акция аясында өз парақшаларына #Мейірімдіболуәдет, #Добротаобразжизни #Моднобытьдобрым хештегімен жазба немесе бейне жариялай алады.
