«Elorda zhastary» тұрғын үй бағдарламасымен 150 несие берілді

«Жұмыс істейтін жастарға арналған «Elorda zhastary» жеңілдікпен кредит беру бағдарламасы бойынша өтінімдер қабылдау қазан айында басталды. Бүгінгі таңда 150 несие берілді», - дейді онлайн брифингіде қалалық жастар саясаты мәселелері басқармасының басшысы Қайрат Қамбаров.

Бағдарлама аясында жұмыс істейтін жастарға 18 млн теңгеге дейін жеңілдетілген несие беріледі.

Шарттар келесідей:

- пайыздық мөлшерлеме – жылдық 5%;
- бастапқы жарна – 10%;
- несие мерзімі – 25 жылға дейін.

Бұдан бөлек, астанада 3 жылдан бері тағы бір бағдарлама іске асырылып келеді. Ол – жұмыс істейтін жастар үшін сатып алу құқығынсыз жалға берілетін тұрғын үй жобасы. Биыл бағдарлама бойынша 4 863 өтінім түссе, берілген пәтерлер саны – 1050. Іріктеу балдық жүйе бойынша, ал пәтерлерді бөлу өтініш берушілердің отбасы құрамына қарай жүргізілді.

Айта кетейік, бүгінде елордадағы жастар саны – 232 065. Қаланың 15 жоғары оқу орнында 62 788 студент (бакалавриат, магистратура, докторантура) білім алып жүр. Жұмыс істейтін жастар саны – 133,2 мың.