Еліміздің үшінші мегаполисінде «Шымкент - қайырымды қала» шарасы өтті
Жиында саясаттанушы Сәкен Мәжінбеков пен жазушы-журналист Күлия Айдарбекова, «Жанубий Қозоғистон» газетінің бас редакторы Әлішер Сатыбалдиев Тәуелсіздіктің қадірі жайында мазмұнды баяндама жасады. Мегаполиске айналған қаланың тұрғындары қандай болуы керек екені жөнінде ой қозғады. Сондай-ақ, басқосуда Шымкент қаласы Ішкі саясат және дін істері басқармасының тапсырысы бойынша және «Серпіліс» қоғамдық қорының ұйымдастыруымен өткен жыр байқауының жеңімпаздары анықталды. Байқауға 40-қа жуық өтінім түсіп, оның 12-сі іріктеуден өткен еді. Әділқазылардың шешімімен бірінші орынды Арқалық Әмәлият жеңіп алса, Дәурен Айманбет - екінші, Арайлым Мұраталиева үшінші орынға ие болды.
Іс-шара аясында жыр мүшәйрасына арналып шығарылған кітаптың тұсауы кесілді. Шымкент қаласы ішкі саясат және дін істері басқармасының басшысы Жанар Бектаева қаланың дамуына үлес қосқан бірқатар азаматтарды алғыс хаттармен марапаттады.