Елімізде 670-тен астам теміржол учаскесін су басу қаупі бар

«Мемлекеттік органдар су тасқыны жағдайын болжау үшін Қазақстан аумағына төнген табиғи қауіптер мен апатты құбылыстар туралы дауылды ескертулерді ұйымдастыруда ресми ақпараттық қызмет көрсету құқығы бар, жалғыз жауапты орган саналатын «Қазгидромет» РМК мәліметтерін пайдаланады. Бұған қоса, мемлекеттік органдар Жайық, Сырдария, Талас, Шу трансшекаралық өзендерінің су тасқыны жағдайына болжам жасау үшін Ресей, Өзбекстан және Қырғызстанның гидрометеорологиялық қызметтерінің болжамды мәліметтерін пайдаланады», - деді Үкімет басшысы.

Оның атап өтуінше, «Қазгидромет» мәліметтеріне сәйкес, осы жылдың 11 наурызында Солтүстік Қазақстан, Ақмола, Ақтөбе, Қостанай, Батыс Қазақстан, Қарағанды облыстарындағы өзен бассейндеріндегі ылғалдылық көлемі орташа көпжылдық мәннен жоғары болып отыр. Сонымен қатар Ақмола, Батыс Қазақстан, Қарағанды, Қостанай және Солтүстік Қазақстан облыстарында жер тоңының қалыңдығы да өткен жылғы көрсеткіштен жоғары.

«Бұған қоса, аталған өңірлерде қар жиналу процесі жалғасып жатыр. Осылайша, ауа температурасы күрт жылынып, қар еритін болса, онда 276 елді мекенді (270 мыңнан астам адам тұрады), автомобиль жолдарының 482 учаскесін, теміржолдың 673 учаскесін, 59 автомобиль көпірін су басу қатері бар», - деді Асқар Мамин.