«Елбасы жылуы» қайырымдылық жобасы 15 шілдеге дейін жалғасады

ҚР Тұңғыш Президенті-Елбасының бастамасымен ұйымдастырылған шара Тараз, Талдықорган, Орал қалалары мен Алматы және Ақмола облыстарында да қолға алынып, 1000 отбасыны қамтыды.

Іс-шара аясында мұқтаж отбасыларға ұн, картоп, жеміс, күріш, қарақұмық, шәй, қант, күнбағыс майы сияқты азық-түлік пен гигиеналық заттар берілді.

Қайырымдылық шарасына іліккен әр отбасы 130 келіге дейін тауар алып отыр.

«Нұрсұлтан Назарбаев қоры мен «Дегдар» қайырымдылық қоры қажет тауарларды Ақмола, Алматы облыстарының аз қамтылған тұрғындарына және Тараз, Талдықорған қалаларында тұратын әл-ауқаты төмен жандарға жеткізіп үлгерді. Короновирус пандемиясы кезінде көп адамдар жұмыстарынан айырылып қалды. Көп отбасылардың жалақасы белгілі бір мөлшерде қысқарып, бұл жағдай олардың әлеуметтік әл-ауқатына тікелей әсер етті. Осы орайда біз «Елбасы жылуы» идеясын қолға алып, оны қарқынды жүзеге асырудамыз. Бұл қайырымдылық іс-шара шілденің 15-іне дейін жалғасын табады», - дейді Нұрсұлтан Назарбаев қоры атқарушы директорының орынбасары Әлкей Марғұланұлы.

«Дегдар» қорының директоры Лаура Ахметова болса, «Елбасы жылуы» жобасының әлеуметтік мән-маңызы зор екенін айтып отыр.

«Жалпы, бұл акция екінші рет өткізіліп жатыр. Алғаш рет жоба осы жылдың сәуірінде ұйымдастырылған еді. Осы уақыт аралығында біз бұл жобаның қоғам үшін қаншалықты маңызды екендігіне көз жеткіздік. Біз әрдайым қамқорлыққа мұқтаж, жүрек жылуына зәру жандарға көмектесуга дайынбыз»,- деді қор жетекшісі.

Әлеуметтік тұрғыдан осал отбасыларға таратылатын азық-түлік тауарларының жалпы салмағы – 120 тонна.

Жобаға Нұрсұлтан Назарбаев қоры мен «Дегдар» қайырымдылық қорынан бөек LIDER KZ волонтерлік қозғалысы атсалысып жүр.

Айта кетейік, мамыр айында осы жоба аясында Алматыда тұрмысы төмен отбасыларға азық-түлік таратылған болатын.