18:04, 06 Наурыз 2021 | GMT +6
Дзюдо: Жансай Смағұлов Ташкенттегі Grand Slam турнирінің финалына шықты
НҰР-СҰЛТАН. ҚазАқпарат - Дзюдодан Ташкентте өтіп жатқан Grand Slam турнирінде қазақстандық Жансай Смағұлов ақтық сынға жолдама алды, деп хабарлайды ҚазАқпарат Olympic.kz сайтына сілтеме жасап.
Жартылай финалда Жансай армениялық Фердинанд Карапетянмен кездесті. Тартысты жекпе-жектің негізгі уақытында жеңімпаз анықталған жоқ. Ал қосымша уақытта Смағұлов «ваззари» ұпайын еншілеп, финалға жолдама алды.
Ақтық сында Жансай моңғолиялық Цогбатаар Ценд Очирмен алтын жүлдеге таласады.
Айта кетелік, Смағұлов жартылай финалда белдескен Карапетян өз тобында Олимпиада жүлдегері, әзербайжандық Рустам Оруджевті жеңген болатын.