Димаш орындаған сериал саундтрегі Қытайдың QQ MUSIC платформасында бірінші орынға шықты

НҰР-СҰЛТАН. ҚазАқпарат – Әнші Димаш Құдайберген орындаған сериал саундтрегі Қытайдың QQ MUSIC платформасында бірінші орыннан көрінді, деп хабарлайды ҚазАқпарат тілшісі.

«Менің қытайлық жаңа сериалға арнап орындаған саундтрегім Қытайдың QQ MUSIC платформасында бірінші орында тұр. Төмендегі фото – менің қытайлық командамен түскен фотосуретім (агенттер, продюсерлер, менеджерлер - Black Golden компаниясынан). Бұл командамен I am singer жобасынан бері үш жыл бойы жұмыс істеп келемін. Жаңа жобаларды күтіңіздер», - деп жазды әнші Instagram парақшасында.

Еске сала кетсек, жақында ғана Димаш Құдайберген Ресей астанасындағы Мемлекеттік Кремль сарайында жаңа «Your Love» әнінің тұсауын кескен еді. Жаңа композиция оның YouTube арнасында жарияланды.

Әнші сонымен қатар 11 наурызда - Киевте, 19 наурызда - Гамбургте, 21 наурызда - Дюссельдорфта, 25 наурызда - Прагада, 29 наурызда - Штутгартта және 4 сәуірде Минскіде өнер көрсетеді. Бұған дейін хабарлағандай, Arnau tour аясында Димаш 11 концерт өткізбек.