15:47, 19 Қаңтар 2022 | GMT +6
Димаш Құдайберген наурыз айында Дубайда жеке концерт береді
НҰР-СҰЛТАН. ҚазАқпарат – Қазақстандық әнші Димаш Құдайберген алдағы наурыз айында Біріккен Араб Әмірліктерінде жеке концерт өткізеді. Әнші бұл туралы Instagram-парақшасында жазды, деп хабарлайды ҚазАқпарат.
«25 наурызда екі жылдық пандемиядан кейін Дубай қаласындағы Coca Cola аренада өтетін үлкен жеке концертімнің өтетіндігін хабарлаймын. Билеттер сторис пен профиль сілтемесінде. Көріскенше, достар!», - деп жазды ол.
Сондай-ақ Д.Құдайберген Instagram-парақшасы бұғатталғанын айтты.
«Өздеріңізбен біраздан бері байланысу мүмкін болмады. Мені іздеп жазған толассыз хаттарыңыз бен қолдауларыңыз үшін мың алғыс!», - дейді ол.
Бұған дейін мәнерлеп сырғанаудан әлем чемпионы Анна Щербакова Еуропа чемпионатында Димаш Құдайбергеннің орындауындағы «Аве Мария» композициясына өнер көрсеткенін жазған болатынбыз.