14:06, 08 Наурыз 2020 | GMT +6
Димаш Құдайберген әлем аруларын мерекесімен құттықтады
РИГА. ҚазАқпарат - Әлемге танымал қазақстандық әнші Димаш Құдайберген нәзік жандарды Халықаралық әйелдер күні мерекесімен құттықтады, деп хабарлайды ҚазАқпарат тілшісі.
«Баршаңызды 8 наурыз мерекесімен құттықтаймын! Сіздерге барлық жақсылықты, яғни бақыт, махаббат, отбасының амандығын тілеймін. Армандарыңыз орындалып, балаларыңыз лайықты адам болып өссін. Ерлеріңіз үнемі жандарыңызда болсын», - деді Д. Құдайберген Ригадағы концерті кезінде әйелдерге арнап айтқан құттықтауында.
Әншінің құттықтауы жазылған видеоны Instagram -дағы эстондық өнер сүйер қауымы жариялады.
Еске сала кетейік, 7 наурыз күні Ригада Димаштың концерті өтіп, оған әншінің өнерін құрметтейтіндер әлемнің 30 елінен келді.
9 наурызда Димаш Құдайберген Мәскеуде, 11 наурызда – Киевте, 19 наурызда – Гамбургте, 21 наурызда – Дюссельдорфта, 25 наурызда – Прагада, 29 наурызда – Штутгартта, ал 4 сәуірде Минскте концерт береді деп күтілуде.