«Болашақ» стипендиясынан айырылған 25 азамат қандай соманы қайтаруы тиіс

Бұған дейін мәлім еткеніміздей,30 қазан күні ҚР Мемлекеттік хатшысы Қырымбек Көшербаевтың төрағалығымен Шетелде кадрлар даярлау жөніндегі республикалық комиссияның кезекті отырысы өтті. Комиссия 2 мәселені қарады: конкурстық іріктеуден өткен үміткерлерге «Болашақ» стипендиясын тағайындау және жекелеген азаматтарды «Болашақ» стипендиясынан айыру.

Комиссия отырысының нәтижесінде 57 үміткерге «Болашақ» стипендиясы тағайындалды. Бүгін стипендиаттардың тізімі жарияланды.

Сондай-ақ комиссия мүшелері магистр дәрежесін алмауы және академиялық оқуды аяқтамауына байланысты 25 стипендиатты стипендиядан айыру туралы шешім қабылдаған болатын. Анықталғандай, олар мемлекетке 800 млн теңгеден астам шығынды өтеуге міндеттелді.

«Болашақ» халықаралық стипендиясы ҚР Президентінің 1993 жылғы 5 қарашадағы №1394 қаулысымен бекітілген. Бағдарламаны іске асырудың 26 жылында 13 978 стипендия тағайындалды. Оның ішінде 1994 жылдан 2004 жылға дейін – 785 стипендия, 2005 жылдан 2020 жылға дейін – 13193 стипендия берілді. 13193-тен 3379 стипендия бакалавриат, 7231 – магистратура, 35 – аспирантура, 87 – клиникалық ординатура, 347 – докторантура, 2114 – тағылымдама бағдарламалары бойынша үйлестірілді.