БҚО-ның Қазталов ауданында жаңа су қоймасы салынады

Өңірдегі су саласының мамандары ведомство басшысына егістіктерге судың жетіспеушілігі мәселесі мен су қоймаларының ахуалы туралы баяндады, деп хабарлайды ҚазАқпарат ҚР Экология, геология және табиғи ресурстар министрлігінің Telegram каналына сілтеме жасап.

Орал қаласынан 440, Қазталов ауданының орталығынан 70 шақырым қашықтықта, «Кіші өзен» өзенінде орналасқан қойма мемлекетаралық мәндегі су торабы болып есептеледі. Қойма Кіші өзен суын Ресейдің Саратов облысы мен Қазақстанның Батыс Қазақстан облысына бөлуге, екі облыстың лимандарына су өзіндік ағынмен берілуі үшін су тірегін құруға арналған.

Ал Үлкен өзен бойынша Ресей Федерациясынан тәуелділікті азайту бойынша қазір жаңа су қоймасын салу жоспарланып отыр. Ол Үлкен өзенде, Қазталов ауданының Жалпақтал ауылында орналасады. Сонымен қатар, өңірдің оңтүстік аудандарына Үлкен және Кіші өзендері бойынша тұрақты су жетіп тұруы үшін Еділ өзенінен 135 млн текше метр су алу мәселесі қарастырылуда. Бұл мақсат үшін республикалық бюджетттен 3,5 млрд теңге бөлу керек.

Ресейдің Еділ өзенінен Варфоломей қоймасы арқылы облыстың Жәнібек, Қазталов, Жанғалы аудандарындағы 1637 гектар тұрақты суармалы егістікке, 44018 гектар лимандық (сағалық) суару алқабына, 324700 гектар су басқан жайылымдарға су жіберіледі. Бұдан бөлек, БҚО-ның оңтүстік аудандарындағы экологиялық ахуалды реттеп отыру үшін Айдын, Сарыайдын, Қамбақты және Қамыш-Самар көл айдындарын су жіберіліп отырады. Су қоймасының сыйымдылығы - 23 млн метр куб.