БҚО-да жаназаға барған ауыл мұғалімінен коронавирус табылды
БҚО тауарлар мен көрсетілетін қызметтердің сапасы мен қауіпсіздігін бақылау департаментінің баспасөз қызметі мәлім еткеніндей, оқиға Ақжайық ауданы Бударин ауылында болды.
Бударин мектеп-бөбекжай кешенінің мұғалімі холецистит ауруымен дәрігерге жүгінген кезде оның COVID-19 жұқтырғаны анықталды. Содан кейін мұғалім жұқпалы аурулар ауруханасына жатқызылды.
Ол осының алдында Ақтөбе қаласына садақаға барып келген.
Үйінде және мектепте мұғаліммен қарым-қатынаста болғандардан алынған сынама теріс нәтиже, яғни коронавирустың жоқтығын көрсетті.
Аудандық бас мемлекеттік санитар дәрігерінің қаулысына сәйкес 9-11 сынып оқушылары қашықтан оқытуға, үй карантиніне ауыстырылған.
Мектепте қорытынды дезинфекция шаралары жүргізілді.
Облыста осы кезге дейін 6975 адамның коронавирус жұқтырғаны белгілі болып, соның 6800-і жазылып шықты. Соның ішінде Орал қаласында – дертке шалдыққан 3813, Ақжайық ауданында – 345, Бөкей ордасында – 76, Бөрліде – 752, Жаңақалада – 140, Жәнібекте – 202, Бәйтеректе – 543, Қазталовта – 233, Қаратөбеде – 73, Сырымда – 239, Тасқалада – 101, Теректіде – 326, Шыңғырлауда 132 адам тіркелді.
Індеттен 117 адам көз жұмды.
Еске сала кетейік, бұдан бұрын БҚО-да карантин тәртібін бұзғандарға 14 млн теңге айыппұл салынғанын жазған болатынбыз.