БҚО-да түйіскен екі жүк көлігі өртеніп, 2 адам мен 39 жылқы жанып кетті

БҚО ТЖ департаментінің баспасөз қызметі мәлім еткендей, оқиға 15 мамыр күні сағат 23.56-да Самара-Шымкент жолының 464-шақырымында Қаратөбе ауданы аумағында болған.

Тіркемесіне 40 жылқы тиелген «КамАЗ» және бос келе жатқан Mersedes-Benz Actros (Түркия) жүк көліктері соқтығысып, түгелдей отқа оранды.

Соның салдарынан «КамАЗ» жүк көлігінің тіркемесіндегі 39 бас жылқы жанып кеткен.

Автокөліктерден өртеніп кеткен екі адамның мәйіті алынды.

Бір адам түрлі жарақатпен Сырым аудандық орталық ауруханасына жеткізілді. Қаза тапқан және зардап шеккен адамдардың кім екені анықталып жатыр.

Бүгін сағат 04.47-де өрт толықтай ауыздықталды.

БҚО полиция департаментінің ресми өкілі Болатбек Белгібеков аталған оқиға бойынша ҚР ҚК 345-бабы 4-бөлігіне сәйкес сотқа дейінгі тергеу амалдары басталғанын жеткізді.

«Қазіргі кезде департамент басшыларының бәрі сол жерде. Оқиғаның мән-жайы анықталып жатыр», деді ҚазАқпарат тілшісіне Б.Белгібеков.

Еске сала кетейік, бұдан бұрын Оралда 3 жасар баланың септикке түсіп кеткенін жазған болатынбыз.