Бірыңғай валюталық одақ құру қарастырылған емес - Ерболат Досаев

«Келісімде экономикалық одақты құру идеясы негіз болғаны нақты көрсетілген, яғни валюталық одақты құру мүлдем ескерілмеген. Бұл бірыңғай валютаға қатысты қауесет қайта-қайта пайда болуда, осыған байланысты сұрақтарды түрлі формада менің өзіме де қойып жатады. Атап айтқанда, бірыңғай валюталық одақты, бірыңғай валютаны құру келісімде қарастырылмаған», - деп нақтылады Е. Досаев Парламент Мәжілісінде тілшілер сауалына жауап бере отырып.

Осы орайда ол ЕАЭО-ға мүше әрбір ел ақша-несиелік саясаты мәселелерінде дербес екенін атап өтті.

«Сондықтан тұтас қаржылық тәуелсіздік Еуразиялық экономикалық одақтың әрбір қатысушысында жекелей сақталады», - деп атап өтті ол.

Бұдан бұрын хабарланғандай, Парламент Мәжілісінің жалпы отырысында «Еуразиялық экономикалық одаққа мүше мемлекеттердің қаржы нарығы саласындағы заңнамасын үйлестіру туралы келісімді ратификациялау туралы» заң жобасы мақұлданды.