Бибісараның жарқын жеңісі еліміздің шахмат тарихында алтын әріппен жазылады - Дәурен Абаев

None
None
НҰР-СҰЛТАН. ҚазАқпарат - ҚР Мәдениет және спорт министрі Дәурен Абаев әлем шахматы тарихындағы ең жас әлем чемпионы Бибісара Асаубаевамен кездесті, деп хабарлайды ҚазАқпарат.

Кездесу барысында министр Бибісара Асаубаеваны құттықтай келе, анасы Лиана Таңжарықоваға алғысын білдіріп, «Дене шынықтыру мен спортты дамытуға сіңірген еңбегі үшін» төсбелгісімен марапаттады.

«Бибісара – ел мақтанышы. Бүкіл әлем көз тіккен беделді турнирдегі Бибісара Асаубаеваның жарқын жеңісі еліміздегі шахмат тарихында алтын әріппен жазылады. Осы орайда Бибісараның ата-анасына, жаттықтырушыларына ерекше алғыс білдіргім келеді. Бибісара Асаубаеваның айтулы жеңісі өселең ұрпақтың шахмат спортына деген қызығушылығын арттырып, ынталандыратыны сөзсіз», - деп атап өтті Мәдениет және спорт министрі.

Естеріңізге сала кетейік, Польша астанасы Варшава қаласында өткен әлем чемпионатында 17 жастағы қазақстандық шахматшы Бибісара Асаубаева «блицте» бірінші орынды жеңіп алып, әлемдік шахмат тарихында әйелдер арасында ең жас шахматшы атағына ие болды.

Сондай-ақ аталмыш чемпионатта Бибісара жылдам шахматтан (рапид) 2-орынды иеленді.

Бұған дейін қазақстандық спортшы Бибісара Асаубаева қыздар арасында 8, 10, 12 және 14 жасқа дейінгі классикалық шахматтан әлем чемпионы, 7, 9 жасқа дейінгі оқушылар арасында әлем чемпионы атанған.


Соңғы жаңалықтар