Бәйдібекте тұрмысы төмен 300 отбасына азық-түлік таратылып жатыр

БӘЙДІБЕК. ҚазАқпарат – Еліміздегі Төтенше жағдайға байланысты қиын-қыстау сәтте Түркістан облысындағы кәсіпкерлер көпбалалы және мұқтаж отбасыларға көмек қолын созуда, деп хабарлайды ҚазАқпарат тілшісі.

Бәйдібек ауданында жергілікті кәсіпкерлер Ғабиден Қапалбаев пен Бақытбек Нақыпбеков елді мекендерде тұратын атаулы әлеуметтік көмек алушылар мен өмірлік қиын жағдайдағы 300 отбасына азық-түлік үлестіруде.

Аталған кәсіпкерлер аудан орталығындағы қоймаға 300 отбасыға арнап 17,5 тонна ұн, 1,75 тонна күріш, 1,75 тонна өсімдік майын жеткізіп берген. Бұл азық-түліктер кезең-кезеңімен тұрмысы төмен жанұяларға үлестіріледі.

Аудандық кәсіпкерлік бөлімінің басшысы Мейіржан Беріков кәсіпкерлердің демеушілігімен бөлінген азық-түлікті әзірге Ақбастау ауылдық округіндегі 30, Боралдай ауылдық округіндегі 36 отбасына таратып берді.