10:24, 07 Тамыз 2020 | GMT +6
Батыс Қазақстанда ірі азық-түлік дүкені жанып кетті
ОРАЛ. ҚазАқпарат – Батыс Қазақстан облысының Жәнібек ауданында ірі азық-түлік дүкені жанып кетті, деп хабарлайды ҚазАқпарат тілшісі.
БҚО Төтенша жағдайлар департаментінің баспасөз қызметінен алынған мәліметке қарағанда, оқиға 6 тамыз күні кешкісін Жәнібек ауылында болды.
Сағат 21.18-де «Удача» дүкенінің төбесі жанып жатқаны жөнінде хабар түсті.
Өрт аумағы 130 шаршы метрді қамтыды.
«Тілсіз жауды» ауыздықтауға №21 өрт сөндіру бекеті (9 техника, 2 техника) және ерікті өрт сөндіру құрылымы (18 адам, 3 техника) жұмылдырылды. Сондай-ақ жедел құтқару жасағы (2 адам, 1 техника), өрт зерттеу зертханасы (2 адам, 1 техника) мамандары да қатысты.
Өрт бүгін сағат 00.55-те сөндірілді.
Қазіргі кезде өрттің шығу себебі, келтірілген шығын анықталу үстінде.
Еске сала кетейік, бұдан бұрын БҚО-да күшті жел мектеп пен тұрғын үйлердің шатырын жұлып әкеткенін жазған болатынбыз.