21:02, 28 Наурыз 2020 | GMT +6
БАӘ-ден тағы 116 қазақстандық елге оралды
НҰР-СҰЛТАН. ҚазАқпарат – Сегіз күні ішінде Біріккен Араб Әмірліктерінен 800 қазақстандық елге оралды, деп хабарлайды ҚазАқпарат ҚР Сыртқы істер министрлігіне сілтеме жасап.
«COVID-19 пандемиясына байланысты БАӘ халықаралық әуе рейстерінің көпшілігін уақытша тоқтатты. Сондай-ақ, елде дезинфекциялау шараларына байланысты автокөлік қозғалысы шектелді. Осыған орай, 20-28 наурыз аралығында Қазақстанның БАӘ-дегі Елшілігі, Дубайдағы Бас консулдығы және Әмірліктердің мемлекеттік органдарының көмегімен Қазақстанға 801 отандасымыз қайтарылды», - деді министрліктен.
Мәлім етілгендей, бүгін «Air Astana» әуекомпаниясының чартерлік рейсімен Дубай – Алматы бағыты бойынша 116 қазақстандық оралды.
«Біздің дипломаттарымыздың күшімен үйге оралуды қажет ететін азаматтарымыз осы рейске қосымша отырғызылды», - деп қосты ведомстводан.
