20:00, 24 Маусым 2022 | GMT +6
Азық-түлікті жеткізу желісі бұзыла берсе, әлемде миллиондаған адамның өміріне қауіп төнеді - Тоқаев
НҰР-СҰЛТАН. ҚазАқпарат - Қасым-Жомарт Тоқаев БРИКС+ ұйымының жаһандық даму жөніндегі жоғары деңгейлі диалогына қатыса отырып, соңғы бірнеше айда әлемде азық-түлік мәселесіне қатысты жағдай күрделеніп кеткенін, егер азық-түлік жеткізу желісінің бұзылуы жалғаса берсе, миллиондаған адамның өміріне қауіп төнетінін айтты.
Қасым-Жомарт Тоқаев әлемдік даму жөнінде айта келе, қазір дүниежүзі бұрын-соңды болмаған геосаяси және экономикалық тұрақсыздықпен бетпе-бет келіп отырғанына назар аударды.
«Соңғы бірнеше айда әлемде азық-түлік мәселесіне қатысты жағдай күрделеніп кетті. Егер азық-түлік жеткізу желісінің бұзылуы жалғаса берсе, миллиондаған адамның өміріне қауіп төнеді. Бүгінде әлемдегі ең ірі азық-түлік өндірушілердің төрттен үші БРИКС елдері және осы Ұйымға мүше мемлекеттердің ауыл шаруашылығы бойынша жалпы ішкі өнімі бүкіләлемдік өнімнің жартысынан астамын құрайды», – деді Қазақстан Президенті.