18:51, 14 Қараша 2019 | GMT +6
Азия чемпионаты: Қазақстандық 5 боксшы жартылай финалға өтті
ҰЛАНБАТЫР. ҚазАқпарат - Моңғолияның Ұланбатыр қаласында өтіп жатқан бокстан жастар арасындағы Азия чемпионатының ширек финалдық бәсекелері аяқталды. Қазақстан сапынан бес боксшы турнирдің жартылай финалына өтті, деп хабарлайды ҚазАқпарат.
ҚР Ұлттық Олимпиадалық комитетінің ақпаратына сәйкес, 49 келідегі Мұхаммедсабыр Базарбайұлы шаршы алаң иесі – моңғолиялық боксшыдан басым түсті.
Қытай боксшысын ұтқан 56 келідегі Бейбарыс Жексен де жартылай финалда жұдырықтасады.
69 келідегі Марғұлан Айдарұлы ирандық қарсыласын жеңіп, келесі айналымға өтті.
Сондай-ақ, Үндістан боксшысынан айла асырған Дархан Дүйсебай (64 келі) ½ кезеңде бақ сынайды.
Ал 75 келідегі Азамат Бектас ширек финалда кореялық қарсыласынан мықтылығын дәлелдеді.