«Ауыл» партиясы жалпыұлттық сауалнама өткізеді
«Ел аманаты» жалпыұлттық сауалнамасы Қазақстанның аумағында өткізіледі. Сауалнамаға Қазақстан Республикасының 18 жасқа толған азаматтарынан қоғамдағы саяси-әлеуметтік және экономикалық мәселелерді жинақтап, оларды шешу жолдарын айқындауға бағытталған. Жалпыұлттық сауалнаманың негізгі мақсаттары – әрбір азаматтың мүддесін қорғау, қоғамдағы өзекті мәселелерді анықтап, тиісті үкіметтік органдарға жеткізу, еліміздің дамуы бойынша тұрғындармен пікір алмасу, ел тұрғындарымен тығыз байланыс орнату, сауалнама ұйымдастыру арқылы Қазақстан Республикасының әрбір азаматының қоғамымызды дамытудағы өзіндік үлесін қосуына мүмкіндік беру, қоғам өміріндегі «Ауыл» партиясының саясатын қалыптастыру үшін өзекті де нақты ұсыныстарды ел тұрғындарынан жинақтау», - деді партияның орталық аппаратының жетекшісі Қуаныш Сейітжанов партияның астанада өткен саяси кеңесінің отырысында.
Ол сондай-ақ жалпыұлттық сауалнаманы өткізу шарттары туралы сөз қозғады. Қуаныш Сейітжановтың айтуынша, сауалнама 2020 жылдың 23 қыркүйегінен 25 қазанына дейін Қазақстанның барлық өңірінде жүргізіледі. Оған қатысу-қатыспау – әркімнің өз еркі.
«Түркістан қаласында «Ел аманаты» республикалық штабы құрылады. Штаб жоба аясында халықпен тікелей жұмыс істеп, дәстүрлі сауалнаманың жүргізілуіне мониторинг жасап, күнделікті есеп беріп отырады. Жалпыұлттық сауалнаманы өткізу шарттары «Ауыл» партиясының саяси кеңесінде бекітіледі. Сауалнаманы өткізу жолдары: біріншіден, есіктен есікке үлгісімен дәстүрлі түрде, екіншіден Facebook, Instagram әлеуметтік желілері арқылы, үшіншіден WhatsApp және Телеграм қосымшалары арқылы өткізіледі», - деді ол.
Оның айтуынша, сауалнамада ҚР Конституциясының құрылымын өзгертуге, оның тұтастығын бұзуға, мемлекеттің қауіпсіздігіне нұқсан келтіруге, әлеуметтік, нәсілдік, ұлтық, діни, тектік, рулық, топтық араздықтарды қоздыруға бағытталған сауалдарға орын берілмейді.
Сауалнаманың электронды платформасы – «Ауыл» партиясының Google Forms сервисі.