Аудиторлық тексеру 198 млрд теңгенің қаржылық бұзушылықтарын анықтады - Смайылов
«Есеп беру кезеңінде бюджет қаражатын игеру барысында туындайтын бұзушылықтардың алдын алу мақсатында 2 779 аудиторлық іс-шара өткізілді. Аудиторлық іс-шаралармен 694 млрд теңге қамтылды. 194 млрд теңгеге қаржылық бұзушылықтар анықталды», - деді бірінші вице-премьер.
Оның дерегінше, тексеру нәтижелері бойынша 179 млрд теңге сомаға тауарларды жеткізу, жұмыстарды орындау, қызметтерді көрсету, есепке алу және бюджетке өтеу арқылы бұзушылықтар жойылды. Жүргізілген камералдық бақылау нәтижесінде 743 млрд теңге сомаға мемлекеттік сатып алу бойынша бұзушылықтардың алдын алу жүргізілді.
«Жыл соңына дейін аз уақыт қалды. Сондықтан, осы уақыттың басым міндеті - біріншіден бюджет қаражатын тиімді және толық игеру. Ол үшін барлық қажетті құжаттарды уақтылы әзірлеп қабылдау қажет және 2019 жылға арналған нақтыланған республикалық бюджетті іске асыру үшін барлық керекті бюджеттік рәсімдерді жүргізіп үлгеру керек. Екіншіден, орталық және жергілікті органдар қараша айында 2020-2022 жылдарға арналған республикалық бюджетті іске асыру үшін мемлекеттік сатып алудың алдын ала жоспарларын әзірлеуі тиіс. Үшіншіден, қарашадан бастап әкімшілер барлық деңгейдегі бюджет қаражаты есебінен 2020 жылға арналған мемлекеттік сатып алу бойынша конкурстарды хабарландыруды бастауы қажет», - деді Ә.Смайылов.