21:21, 10 Сәуір 2018 | GMT +6
Атыраудың «Ақ Жайық» резерватындағы өрт 15 гектарды шарпыды
АТЫРАУ. ҚазАқпарат - Атырауда «Ақ Жайық» мемлекеттік табиғи резерватының аумағында шыққан өртті сөндіруге тікұшақтар тартылды, деп хабарлайды ҚазАқпарат тілшісі.
«Бүгін түстен кейін резерваттағы өртті сөндіруге арнайы тікұшақтар тартылды. Олардың бортына 5-8 тонна су сияды. Бірақ, өртті сөндіруге кіріспес бұрын мамандар әуеден қамыс жанып жатқан жағалауды қарап шықты. Өрттің шарпыған аумағы 15 гектарға дейін артқаны анықталды», - деп хабарлады «Ақ Жайық» МТР бас маманы Ғани Ағыбаев.
Еске салайық, резерватта өрттің шыққаны туралы алғашқы хабарлама жексенбі күні сағат 21:00-де түскен. Өртті сөндіруге 60 адам мен 10-нан астам техника атсалысып жатыр.