Атырауда жасөспірімдер үйінің жаңа ғимараты ашылды
Жасөспірімдер үйінің құрылысына Каспий құбыр консорциумы 241 млн теңге жұмсаған. Консорциумның бас директоры Николай Горбанның айтуынша, былтыр Атырау облысындағы қайырымдылық жобаларын іске асыруға 3 млн доллар бағытталған. Ал, соңғы бес жылда өңірдің әлеуметтік инфрақұрылымын дамытуға шамамен 10 млн АҚШ доллары бөлінген.
Атырау қаласының әкімі Қайрат Оразбаевтың мәлім етуінше, жаңа ғимарат өткен XX ғасырдың 60-жылдарындағы нысанның орнынан бой көтерген. Нысан 25 тәрбиеленушінің жайлы орналасуы үшін есептелген. Жобаға сәйкес бірінші қабатта асүй, кір жуатын бөлме, демалыс бөлмелері, кинотеатр ретінде қолдануға болатын конференц-зал мен жаттығу залы орналасқан. Соңғысы веложаттықтырғышпен, жүгіруге арналған жолмен, көпфункциялы бірнеше спорттық құрал-жабдықпен қамтылған. Екінші қабаттағы жатын бөлмелер түрлі жиһазбен жабдықталған.
Жасөспірімдер үйі балалар ауылдарының тәрбиеленушілері мен балалар үйлерінің, жетім және ата-анасының қамқорлығынсыз қалған балаларға арналған мектеп-интернаттардың түлектерін әлеуметтік бейімдеу үшін ашылған. Мұнда 16-23 жас аралығындағы жасөспірімдер мен жастар тұрады. Кейін жергілікті әкімдік беретін пәтерлерге көшеді.