Атырауда тұрғындардың серуендеуіне кедергі келтірген 15 велосипедші жазаланды
Облыстық полиция департаменті баспасөз қызметінің мәліметінше, Атырау қаласындағы велосипедшілердің Жайық өзенінің жағалауында сағат 19:00-23:00 аралығында жүруіне тыйым салынған.
«Бірақ, велосипедшілер бұл тыйымды ескермейді. Сөйтіп, велосипедшілер тыйым салынған уақытта жағалауда жүріп, тұрғындардың серуендеуіне кедергі келтіреді. Сол себептен, тұрғындар тарапынан шағым көбейді. Осыған байланысты Атырау қалалық полиция басқармасының патрульдік полиция құрамынан жаяу патрульдеу бекеті ұйымдастырылды. Өткен аптада Жайық жағалауында сағат 19:00-23:00 аралығында велосипедпен жүрген 15 адам анықталды» -деп хабарлады департаменттің баспасөз қызметі.
Велосипедпен тұрғындардың серуендеуіне кедергі келтіргендерге қатысты ҚР Әкімшілік құқықбұзушылық туралы Кодексінің 615-бабымен әкімшілік хаттама толтырылып, әрқайсысына 2 айлық есептік көрсеткіш көлемінде айыппұл салынды.
Еске сала кетелік, бұған дейін Атырауда велосипед ұрлаған жігітке қатысты 11 қылмыстық іс тіркелгенін жазған едік.