06:00, 22 Қыркүйек 2020 | GMT +6
Атырауда бір топ азаматқа мерекелік медаль табысталды
АТЫРАУ. ҚазАқпарат – Атырауда бір топ азамат «Қазақстан халқы Ассамблеясына – 25 жыл» мерекелік медалімен марапатталды, деп хабарлайды ҚазАқпарат.
«Бұдан 25 жыл бұрын этносаралық қатынасты үйлесімді ету үшін Қазақстан халқы Ассамблеясы құрылған болатын. Ассамблея конституциялық мәртебеге ие болды. Қазір Қазақстан халқы Ассамблеясы – еліміздегі этностар өкілдерін бір шаңырақ астына топтастыратын құрылым. Осындай мықты институттың арқасында Қазақстан – бейбітшіліктің бесігі, ырыс пен ынтымақтың мекеніне айналды», деді облыс әкімі Махамбет Досмұхамбетов.
Әкім ҚР Президентінің Жарлығына сәйкес Атырау облысының бір топ азаматтарына «Қазақстан халқы Ассамблеясына – 25 жыл» мерекелік медалін табыстады. Наградталғандардың арасында қоғамдық ұйымдар мен партиялардың, этномәдени бірлестіктер мен БАҚ өкілдері бар.