Атырауда 2,6 млн теңге айыппұлын төлемеген жүргізуші ұсталды

Полиция қызметкерлері «Атырау-Доссор» тасжолында «Toyota Camry» автокөлігін тоқтатпақ болған. Алайда, жүргізуші полициейлердің талабына бағынбаған.

Тәртіп сақшылары қала шетіндегі «Жұлдыз» шағынауданында тоқтатты. Тексеру кезінде көліктің мемлекеттік белгісі жалған болып шықты.

«24 жастағы жүргізуші ҚР Әкімшілік құқық бұзу кодексінің бірнеше бабын бұзған. Соның негізінде 7 әкімшілік хаттама толтырылып, 180 570 теңге көлемінде айыппұл салынды. Бұдан басқа, аталған кодекстің 590-бабының 4-бөлімімен және 596-бабының 3-бөлімімен тағы 2 әкімшілік хаттама сотқа жолданды» деп хабарлады облыстық полиция департаментінің баспасөз қызметі.

Сондай-ақ, аталған автокөліктің жалған мемлекеттік белгісінде 2 млн 391 858 теңгені құрайтын 104 айыппұл, өзіне тіркелген мемлекеттік белгісінде 272 мың 244 теңгенің 12 айыппұлы бары анықталды.

Екі миллион теңгеден асатын бережағы бар автокөлік айып тұрағына қойылды.

Еске сала кетелік, бұған дейін Атырауда 14 млн теңге айыппұлын төлемеген 192 жүргізуші ұсталған еді.