18:45, 14 Маусым 2021 | GMT +6
Атырау облысында жүк көлігі басқан жігіт мерт болды
АТЫРАУ. ҚазАқпарат – Атырау облысында жүк көлігі басқан жігіт мерт болды, деп хабарлайды ҚазАқпарат.
Облыстық полиция департаменті баспасөз қызметінің ақпаратына сүйенсек, Жылыой ауданында адам өліміне соқтырған еңбек қағидаларын бұзу дерегі тіркелген.
Оқыс оқиға 12 маусымда сағат 17:00 шамасында Теңіз кенішіндегі зауыттардың бірінің аймағында болған.
«Үйілген топырақтың жанында 1987 жылы туған жүргізуші «Шахман» маркалы ауыр жүк тасымалдау автокөлігімен 29 жастағы қызметкерді басып кеткен. Қызметкер оқиға орнында қаза тапты», - деп хабарлады департаменттің баспасөз қызметі.
Қазір аталған дерекке қатысты ҚР Қылмыстық Кодексінің 156-бабының 3-бөлігімен сотқа дейінгі тергеу амалдары жүргізілуде.
Еске сала кетелік, бұдан бұрын Теңіз кенішінде автобус пен пикап соқтығысқанын хабарлаған едік.